घर

घर म्हणजे नक्की काय असतं हे मी खऱ्या अर्थाने दोन वेळा  अनुभवलं  आहे . १९९३ साली किल्लारी  येथे भूकंप झाला  त्यावेळी  म्हणजे २७ वर्षांपूर्वी . माझं गाव लातुर जिल्ह्यातलं त्यामुळे आम्हालाही भूकंपाची झळ  पोहचली होती.  भूकंप हा शब्द काढताच सर्व आठवणी बाहेर येतात व अजूनही भीती वाटते .
भूकंप व कोरोना यामध्ये घर हा शब्द कॉमन आहे फरक इतकाच आहे कि भूकंपात घर सोडावं लागलं होतं तर  कोरोना मध्ये घर पकडावं लागलं . घर सोडताना व घराला बिलगताना घराची खरी किंमत कळते . घरामध्ये एक अदभूत शक्ती  असते बिलगताना व विलग होताना सतत आपल्या सोबत असते .
  घर म्हणजे नेमकं  काय ?
दोन अक्षरांचा शब्द का चार भिंती त्यावरचं छत असतं असं  नव्हे  तर घर म्हणजे जगण्यासाठी विणलेलं  सुंदर स्वप्न असतं . जीवन जगताना अन्न , वस्त्र  महत्वाचे आहे तेवढाच  निवाराही महत्वाचा आहे .
हा आपला निवारा , आपलं घर कसं  असावं
आचार विचार हि घराची आखणी असावी ,प्रेम हा घराचा पाया असावा ,थोर माणसे घराच्या भिंती असाव्यात  . सुख हे घराचे छत असावे . जिव्हाळा हा घराचा कळस असावा  ,माणुसकी हि घराची तिजोरी असावी  ,शांतता  हि घराची  लक्ष्मी असावी   ,पैसा  हा घराचा पाहुणा असावा  तेथे समाधान  हे  सुख असते व अशा घरातच ईश्वराची जागृत मूर्ती  असते .
आपल्या घरातील ईश्वराची  जागृत मूर्ती पाहायची असेल तर घरात बसून करमत नाही म्हणण्यापेक्षा घराच्या खूप जवळ येण्याची संधी मिळाली आहे , संधीचं  सोन करा व घराला कोंडवाडा म्हणण्यापेक्षा घराला प्रेमाने जवळ करा ,घर  रुपी ईश्वर तुमचा प्रेमाने सांभाळ करेल .