माझी आई

 माझी आई 

माझ्या हस्ताक्षराच्या  ग्रुप मध्ये   ' माझी आई ' हा विषय लिहायला दिला होता . 

मुलांना सांगितलं  तुमची आई कशी आहे मला सात ते आठ वाक्यात लिहून सांगा . वाक्यरचना चुकली तरी चालेल पण अक्षर सुंदर हवं . 

विषय दिला तसा  माझ्या डोक्यात बालपणीचा ,शाळेत असताणाचा  निबंध आठवला  . 

निबंधाची सुरुवात " स्वामी तिन्ही जगाचा आई विना भिकारी " या वाक्याने ठरलेली . 

निबंधाच्या नियमाप्रमाणे सुंदर  सुंदर शब्द , वाक्यप्रचार ,म्हणी  निबंधामध्ये टाकायचे ,निबंध सुंदर बनवायचा . त्या लेखनामध्ये  निबंधच  सुंदर बनायचा , माझी आई  फक्त नावाला असायची . 

आताच्या पिढीचा ,या लहान लहान मुलांचा निबंध पहिला तर असं  जाणवल या मुलांनी , आई ला  मुख्य स्थान दिलं  होतं . भलेही माझी आई माझ्यासाठी हे  करते ,ते  करते  असे शब्द होते पण स्वतःच्या हाताने सजवलेली आई मला खूप आवडली . एका  मुलीने  तर चक्क  कबुली दिली , ' मला असं  वाटायचं माझी आई  काय  बरं  असं  विशेष करते , पण निबंध लिहिताना कळलं  कि माझी आई कितीतरी  गोष्टी करते . याची मला  कधी जाणीवही नव्हती '. 

आई हा लेखनाचा  विषय नसून ती एक  जाणीव आहे . मापासून मनापर्यंत जुळलेला धागा आहे , जो कधीच दिसत नाही . 

आई हि  खरंच आई असते , आई काय  असते हे  दाखवून दिसत नाही ,ती अनुभवावी लागते .